قصة الأرنب أرنوب وحكايته مع الخس والجزر.
 |
| الأرنب أرنوب وحكايته مع الخس والجزر - supermum |
كان ياما كان ولا يحلي الكلام إلا بذكر النبي عليه الصلاة والسلام ، كان في غابة كبيرة عايش فيها مجموعة من الأرانب ، وكان في أرنب صغير جميل إسمه أرنوب ، كان بيحب ياكل الخس والجزر ، وفي يوم من الأيام قال أرنوب لمامتو :
 |
| أرنوب والخس والجزر - supermum |
قال أرنوب :- صباح الخير يامامتي .
قالت ماما :- صباح النور يا أرنوب .
رد أرنوب وقال :- ماما يا ماما أنا جعان أوي ممكن من فضلك تحضريلي الفطار ؟
قالت ماما :- طبعا يا أرنوب حالا الفطار هيكون جاهز .
قال أرنوب :- أنا حاسس اني كسلان شوية هروح أعمل تمارين الصباح لحد لما ماما تحضر الفطار .
وراح أرنوب يعمل تمارين الصباح ، ويلعب برا البيت لحد ما ماما ندهتلو وقالتلو انها خلصت الفطار، دخل أرنوب البيت علشان يفطر لقي الفطار خس وجزر زعل أرنوب وقال ...
 |
| أرنوب والخس والجزر - supermum |
أرنوب :- ايه دا ياماما خس وجزر أنا زهقت ياماما من الخس والجزر كل يوم كل يوم خس وجزر .
ردت ماما وقالت :- ايه دا يا أرنوب الكلام دا ، أنا أول مره أسمعك بتقول كدا ، الخس والجزر دول أكل كل الأرانب ولازم نشكر ربنا ونقول الحمد لله .
زعل أرنوب شوية ومرضاش ياكل وقال لمامتو :- ماما ممكن أروح أتمشى شوية في الغابة ؟
ردت ماما وقالت :- انت مش هتفطر يا أرنوب ؟
قال أرنوب :- لا ياماما متشكر مش هفطر دلوقتي .
قالت ماما :- ماشي يا أرنوب اتفضل بس لو سمحت متتأخرش .
خرج أرنوب من البيت وراح يتمشى في الغابة وهو زعلان علشان مش عايز ياكل خس وجزر ، وقال أنا هروح أشوف أصحابي الحيوانات بياكلو ايه وآكل معاهم ، وهو ماشي في الطريق قابل الأسد ملك الغابة .
 |
| أرنوب وملك الغابة - supermum |
قال أرنوب :- صباح الخير ياملك الغابة .🐇
رد الأسد :- صباح الخير يا أرنوب مالك زعلان ليه ؟🦁
قال أرنوب :- بصراحة أنا جعان ومش لاقي حاجة أكلها ، وسأل أرنوب الأسد وقالو : هو أنت بتاكل ايه ؟🐇
رد الأسد :- أنا باكل لحمة اتفضل خد حته وجرب دي طعمها لذيذ بس محتاجة أسنان قوية .🦁
قال أرنوب :- لا لا متشكر ياملك الغابة أنا معنديش أسنان قوية ذيك ، بعد اذنك أنا همشي .🐇
قال الأسد :- اتفضل يا أرنوب مع السلامة .🦁
ساب أرنوب الأسد وكمل مشي في الغابة فشاف الزرافة أم رقبة طويلة واقفة تحت الشجرة وبتاكل .
 |
| أرنوب والزرافة - supermum |
قال أرنوب للزرافة :- اذيك يازرافة ياطويلة عاملة ايه؟🐰
ردت الزرافة :- أنا كويسة يا أرنوب ، مالك زعلان ليه ؟🌴
قال أرنوب :- جعان يازرافة ومش لاقي حاجه أكلها ، هو أنتي بتاكلي ايه يازرافة ؟🐰
ردت الزرافة :- أنا باكل أوراق الشجر اتفضل كل معايا يا أرنوب .🌴
قال أرنوب :- بس الشجرة دي عالية أوي عليا ، وأنا معنديش رجلين ولا رقبة طويلة زيك ، أنا مقدرش أطولها ، متشكر يا زرافة بعد اذنك أنا همشي .🐰
ومشى أرنوب وساب الزرافة وكمل مشي في الغابة ، بص أرنوب لقى الفيل فلافيلو أبو حجم كبير وزلومة طويلة طويلة .
 |
| أرنوب والفيل فلافيلو - supermum |
قال أرنوب للفيل :- صباح الخير يافلافيلو ، أخبارك ايه؟🐇
رد الفيل :- صباح الخير يا أرنوب ، أنا بخير ، مالك يا أرنوب زعلان ليه كدا ؟🐘
قال أرنوب :- أنا جعان ومش لاقي حاجة أكلها ، هو أنت بتاكل ايه ؟🐇
رد الفيل :- أنا باكل الفول السوداني يا أرنوب ، اتفضل كل معايا دا طعمو حلو أوي .🐘
قال أرنوب :- الفول السوداني دا عندو قشر وأنا اديا صغيرة معرفش أقشرو ، وكمان أسناني ضعيفة مقدرش أكلو ، شكرا يافلافيلو بصراحة مش هقدر .🐇
مشى أرنوب وكان الثعلب المكار شايف أرنوب من بعيد ومراقبو لأنه كان جعان أوي ، ولما قابل أرنوب الثعلب قالو ..
 |
| أرنوب والثعلب - supermum |
قال أرنوب :- صباح الخير ياتعلوب ، عامل ايه ؟🐇
رد التعلب :- أنا بخير لما شفتك يا أرنوب ، وضحك التعلب ضحكة مكارة .🐕
قال أرنوب :- ممكن أعرف ياتعلوب أنت بتحب تاكل ايه ؟🐇
رد الثعلب :- ضحك تعلوب وقال أنا بحب آكل الأرانب 🐕.
جرى أرنوب بسرعة وهرب من الثعلب ، وجرى علي بيته ، وقفل الباب بسرعة بعد ما اتأكد ان التعلب مش برا ، وقال لمامتو ..
 |
| أرنوب الشطور - supermum |
قال أرنوب :- ماما يا ماما أنا هاكل الخس والجزر الي أنا متعود أكلهم كل يوم ، دا أحلي أكل في الغابة ، ومش هقول اني زهقت منو تاني أبدا ، دي نعمة من عند ربنا ولازم نقول الحمد لله ، أنا بحبك أوي أوي ياماما ، وهسمع كلامك دايما بعد كدا .🐇
ردت ماما :- برافو عليك يا أرنوب دي نعمة جميلة ناكلها ونقول الحمد لله ، وأنا كمان بحبك أوي يا أرنوب 🐰.
وبكدا ياحبايبي ياحلوين نكون اتعلمنا من أرنوب منزعلش مامتنا وناكل أكلنا ونقول الحمد لله .
المصدر :- العاب فرافيرو للأطفال
إرسال تعليق