ومره واحده تلاقي بنوتك كبرت وطولت فتفرحي وتقولي خلاص هتشيل عني وتساعدني فتتصدمي بالواقع لما تطلبي منها تساعدك ،فتبصلك كأنك أجرمتي وبتطلبي شئ مش من حقك تطلبيه أصلا ، أو تقولك أصلي مبعرفش ، طيب تعالي اعلمك ، لا لا مش عايزه اتعلم.. ويالها من صدمه 😓😑😩
- 😡طبعا وقتها بتزعلي وتتعصبي عليها وتبدأ المشاكل بينكم وتقوليلها انتي بقيتي طولي ومش عارفه تعملي حاجه وطبعا هتتخانقو ودا لانك خلاص عايزه تعوديها تشيل عنك وهيا مش متعوده انك تقوليلها كدا وخلاص مش هتلاقي عندها استعداد انها تبذل مجهود في حاجه بتلاقيها عالجاهز...
بنتك المراهقة 👧دايما بتختبر حدودها و طول الوقت عايزة توسع الحدود دي بإنها تاخد حريات أكتر و مسؤوليات أقل.
و بعد ما كانت بتقول حاضر و أوكي على معظم الأوامر ، بقت بتقول لأ و مش عايزة و مش هعمل لما بقت مراهقة.
طبعا كلنا عارفين إننا لازم نحملهم مسؤوليات من وهما صغيرين، لغاية ما يتعودوا إنهم فعلا مسؤولين..
لكن علشان نعلم المراهقات ازاي يتحملو المسئوليه يبقا لازم يكون في حجات ناخد بالنا اننا منعملهاش ابدا معاهم زي مثلا :-
انك تهزقيها مثلا أو تديها محاضره في المسئولية وأبدا بلاش تزهقي وتعملي انتي بدالها.
ايه بقا الي هنعملو علشان نخلي بنتنا شخصيه مسئوله ؟ 👧
1- 👈حددي أكتر مشكلة بتحصل بينكم في المسؤوليات، يعني مثلا ؛
لو هي دايما بتقولك انتي مغسلتيش هدومي ليه، حطيلها باسكت غسيل في أوضتها و قوليلها لما الباسكت نصه يتملي، حطي الهدوم اللي فيه في الغسالة وشغلي عليهم ولما تخلص انشريهم ولما ينشفوا لميهم واطويهم مثلا كدا هتعرف ان هدومها هيا مسئوليتها ودا مثلا من سن 9 سنين.
2- 👈الروتين حاجه مهمه جدا في انها تعرف تحدد ايه المسئوليات المخصص ليها انها تعملها.
3-👈 لما تطلبي منها حاجه اطلبيها بشكل محدد وبسيط يعني مثلا اطوي هدومك وحطيها في مكانها في الدولاب متقوليلهاش روقي البيت مثلا بلاش طلبات عموميه او غامضه وياريت لو تحدديلها مهماتها في ليسته ملزوقه عالحيطه مثلا بنواعيد تتفقو عليها.
4 -👈 اتفقوا سوا علي عقاب هيتنفذ عليها لو مثلا مخلصتش الي وراها ، يعني مثلا لو مخلصتش علشان الموبايل شاغلها اسحبيه منها مده معينه او يوم كامل ، او لو عايزه تخرج ومخلصتش الي وراها تخلص الي وراها الاول او تتحرم خالص من الخروج وطبعا كل دا من غير زعيق او خناق او حرقه دم اتعاملي بهدوء تام ومتزعقيش مهما اتنططت قدامك خليكي قد كلمتك ومتتنازليش عنها ابدا هيا دي القوانين ولازم هتحترمها وتنفذها.
5 - 👈حاجه مهمه جدا انك وانتي بتعملي رقم ٣ و ٤ انك تحسسيها انك بتحبيها ومتحسسيهاش ابدا بالقهر قوليلها دا اتفاق بينا ودي مسئولياتها وكان لازم تعمل حسابها وتخلص كل الي وراها بدري علشان تخرج ، هيا هتحاول طبعا تفلفص منك وتستفذك عاطفيا عشان تخرج من غير متخلص وتنفذ مسئولياتها ولو وافقتي وخرجت من غير ما ترتب وتخلص الي وراعا اعملي حسابك انك ابدا مش هتعرفي تخليها تشيل المسئوليه او ترتب تاني خلاص ، عرفيها ان الاتفاقات لازم تحترمها وتنفذها ودي قاعده وبعد ما القاعده تثبت وتمشي عليها ممكن تعديلها بعض مره عادي وترخي الحبل شويه صغيره.
6 - 👈حسسيها انك علطول واقفه في صفها ومعاها مش ضدها ابدا ولو اتكرر انها مش بتخلص الي وراها اقعدي معاها واتكلمو وقوليلها تعالي نشوف سبب انك دايما مش بتخلصي الي وراكي ودورو علي حل ليه.
7 - 👈لازم تعرفي ان بنتك مش نسخه منك يعني ممكن عادي تكون مختلفه عنك تماما سواء في الطبيخ او ترتيب البيت او حتي مقابله الضيوف ، ولازم تحترمي الاختلاف دا وتقبيله وتمدحي كمان اختلافها وشخصيتها المميزه المختلفه عنها علشان تعرف انها مش نسخه من حد.
8 - 👈بطلي تنقذيها دايما ، لان في شعره رفيعه جدا بين تقديم الدعم و بين انك تمشيلها حياتها زي منتي عايزه ، يعني مثلا لو بوظت حاجه قوليلها فكري واتعلمي ازاي تصلحيها بنفسك متروحيش تصلحيها انتي او مثلا تروحي تكلمي حد عشان تصلحي الي هيا عملتو، هيا ليها لسان وتعرف تتكلم لازم تتعلم الشجاعه وتواجه الي عملتو وتصلحو.
9 - 👈امدحيها كتير واشكريها علي اي حاجه حلوه تعملها دايما ولكن ابعدي عن الجوايز الماديه لانها بعد شويه اول ما الجايزه تفقد معناها هيجيلها احباط ، حاولي تستخدمي دايما المدح البسيط زي مثلا انتي قدها ، انا واثقه فيكي ، انا متأكده انك هتطبخي أكل لذيذ أحلي من أكلي ، أحضنيها وطبطبي عليها خليها دايما تثق في نفسها وتحس انك شايفه ومبسوطه بالمجهود الي هيا عملتو وتفرحو سوا بالنتيجه.
10- 👈شجعيها كتير انها تعمل اعمال خيريه وتطوعيه لله ، لان الاعمال دي هتنمي عندها حس المسئوليه والتعاطف مع الفقير والاحساس بالآخرين والثقه بالنفس. 🌺🌱
إرسال تعليق